حق خود ارادیت ءِ نوکیں لوٹ ءُ آجوئی پسند گَل

سوچنیں دردے دل ءِ نگھبان اِنت، ھچ دل ءَ میار اِت

گُشتگیں گَپّانی ھبر گران اِنت ھچ دل ءَ میار اِت

کوئٹہ / مضمون (ریپبلکن نیوز) سوچنیں درداں دل سُپتگ ءُ چار گور ءَ سُمب سُمب کُتگ ءُ آزگیں ٹپّ داتگ، کول ءِ لَچّہ کاریں سنگت ئیگ ءَ گُشتگیں گپّانی ھبر گران اِنت بَلے دل ءَ آرگی نہ اِنت۔

چندے روچ پیش ماں جنیوا ءَ انسانی ھَـکّانی میان اُستمانی ادارہ "یو این ایچ آر سی” ءِ چِلُّمی دیوان برجم دارگ بوت، کہ ماں ھمے دیوان ءَ بی ایس او آزاد ءِ گوستگیں وھد ءِ "چیئرپرسن” بانُک کریمہ بلوچ ءَ بھر زُرتگ اَت ءُ بلوچستان ءِ بلوچ لَس مھلوکات ءِ پادمال کُتگیں انسانی ھَکّانی دَرگت ءُ در ءَ گشتانک داتگ اَت ءُ وتی لوٹ ءُ گَـرَز پیش کُتگ اِت اَنت، بلوچستان نیوز ءَ چے شِنگ بوتگیں ھالانی رِد ءَ بانُک کریمہ بلوچ ءَ 20 سال ءَ چے پد ماں انسانی ھکّانی میان استمانی ادارہ ءِ چِلُمی برجم داشتگیں دیوان ءَ چہ آزاد بلوچستان ءِ لوٹ ءَ دزکش بیتگ حق خود ارادیت” ءِ نوکیں لوٹ کُتگ، اَنچوش بی این ایم B.N.M لندن زون ءِ حکیم واڈیلو ءَ ھم کریمہ بانُک ءِ پیشکش کُتگیں گالبند” اصطلاح ” حق ءِ خود ارادیت” ءِ پلامرزی ءَ ماں وتی بلاگ ءَ تامُر بندے”ویڈیو کلیپ” ایرکُتگ۔

ھمے "سیلف ڈیٹرمینیشن” گالبند ءِ نام ءَ پہ بلوچ ءُ بلوچستانیاں پادمال کُتگیں انسانی ھکّانی پچگرگ ءَ "اسٹارگل” ءُ جَد ءُ جُھد کَنگ ءِ لوٹ ءَ پیش کَـنگ ءَ اِنت ـ چوناھیگا اے زانتگیں ھبرے کہ ھمے گالبند حق خود ارادیت” مرچیگ ءَ چے چنت سال پیش بلوچستان ءِ پارلیمانی گَلّ بزاں B.N.P مینگل ءِ مزن کارمستر "صدر” اَختر مینگل ءَ پہ بلوچ ءُ بلوچستان ءِ پادمال کُتگیں ھَکّانی پَچگرگ ءَ کارمرز ءُ پیش کتگ اَت، بگندئے آ روچاں اَختر مینگل ءُ بی این پی B.N.P مینگل اَچ بی ایس او آزاد B.S.O AZAD ءُ کریمہ بانُک ءُ بی این ایم B.N.M ءِ نیمگور ءَ پہ "حق خود ارادیت” ءِ لوٹ کنگ ءَ نام ءَ مناپک ءُ "فاسق” ءُ دگہ دگہ نازیبائیں گال ءُ دوا ءُ بداں گوں نازینگ بوت، بی ایس او آزاد B.S.O AZAD ءُ بی این ایم B.N.M ءَ بی این پیB.N.P مینگل ءُ اَختر مینگل ءِ پیش کُتگیں گالبند "اصطلاح” ءِ بِـگیر ءَ گوں ترندی ءَ زھرشانی کنان ءَ اَختر مینگل ءُ بی این پیB.N.P مینگل پیش کتگیں گالبند ءَ "فاسق” ءُ مناپکانی گالبَـند ءِ نام دات ءُ آزاد بلوچستان ءِ نارہ گوں زور ءُ شور دیم ءَ آورت، ھمے 20 بیستیں سالانی نیام ءُ میانجی ءَ آزادی لوٹوکیں گَلّ ءُ پارٹیانی بزاں بی ایس او آزاد B.S.O AZAD ءُ بی این ایم B.N.M ءِ نارھانی سَـوب ءَ ماں شورش جت ءُ جنگ زَدھیں بلوچستان ءَ گیش چہ 35000 ھزار ءَ بزاں کساس 40000 ھزار بلوچ پاکستان ءِ رستریں لشکر ءُ چیریں ادارھانی دست ءَ گار ءُ گمسار کناینت ءُ دانکہ روچ مروچی گار ءُ بیگواہ اَنت دگہ 8000 ھزار بلوچ کوشارینت، گَپَڑے اَچ ھمےکُشتگیں بلوچانی شُمار ءَ زانگولیں لاش "مسخ شدہ لاش” ءِ دروشُم ءَ پہ بلوچ راج ءَ سوگات کنگ بیت ءُ گَـپَڑے دگہ اَچ کُشتگیں بلوچانی لاش ماں بَـرّ ءُ بیدھاں دؤر دیگ بیت اَنت۔

ھمے نیام اَگاں من رَد مَـباں ءَ یکبرے پد ءَ سال 2012 ءَ مارچ ءِ ماہ ءَ بی آر پی B.R.P ءِ مزن کارمستر "صدر” واجہ براھُندگ بگٹی ءَ گوں مھران مَـری بلوچ ءِ ھمراھی ءَ چہ سوئزر لینڈ ءَ گوں پاکستانی میڈیا ءَ ترانے کُت بزاں گوں کامران خان ءَ یکّ T.V چینلے ءَ ماں وتی گُلگدار "انٹرویو” ءِ تہ ءَ گُشتگ اَت کہ گوں میان اُستمانی مُلک ءُ مُلکی جھگیرانی موجودگی ءَ "ریفرنڈُم” ءِ نام ءَ ھمے حق خود اداریت” ءِ گالبَند چیلنج ءِ دروشم ءَ پہ کامران خان ءُ پاکستان ریاست ءِ دیم ءَ کارمَرز کُتگ اَت تہ بگندئے بی ایس او آزاد ءِ چیئرپرسن بانُک کریمہ بلوچ ءَ ءُ بی این ایم ءَ جھان سر ءَ زُرت کہ نواب براھُندگ بگٹی ءَ پہ پاکستان ءِ آیگ ءَ گوں پاکستان ءَ معائدہ کُتگ چہ راجی زُرمبشت آجوئی ءَ دَزکش بوتگ ءُ پہ وتی تَـچگ ءَ "راہ فرار” ءِ شوھاز ءَ اِنت، ریفرنڈم ءِ نام ءَ حق خود ارادیت ءِ گالبند ءِ نیمون ءَ کنگ ءَ اِنت، وھد گوزان بوت بلوچستان ءِ کُنڈ کُنڈ ءَ یکجاھی مانش "اجتماعی قبر” وَدی بیان بوت اَنت، پہ دَرورے ھُـزدار توتک ءِ یکجاھی مانش ءُ دگہ دگہ۔۔۔

بگندئے ھمے وت پرستیں آزادی پسند گَلّ ءُ پارٹیاں پہ بلوچ ءُ بلوچستانیاں کوشارینگ ءَ پاد ماں یکّیں بوٹ ءَ کُتگ اَت گوں آزاد بلوچستان نارہ ءَ بی آر پیB.R.P ءُ براھُندگ بگٹی ءِ بِـگیر ءَ ھم اِشاں جھان سر ءَ زُرت ءُ نہ بیتگیں کُت، مرچی 20 سال ءَ پد ہمے وتگڑ ءُ وت پسندیں پارٹیاں بلوچ ءُ بلوچستانیانی دودمان پناہ ءُ سیاہ کتگ سدانی ھساب ءَ دھـات پاکستانی رستریں لشکر ءِ دست ءَ مانداراینتگ ءُ سرجمیں راجے "خانہ بدوش” ھیران ءُ ویران کتگ ءُ ھور گوں بانُکیں گُھار زَرینہ مَری ءَ 140 بلوچ زالبول ماں پاکستان ءِ رستریں لشکر ءِ ازیتگاھاں سر کتگ، نوں وھدے کہ بانُک کریمہ بلوچ ءَ ماں بی ایس او آزاد ءَ ھچ رَنگیں اُگدھے نیست ءُ بی این ایم ءِ وت ماں وتی تہہ ءُ توکی اختلافات ودان انت ، نوں بی ایس ءُ آزاد ءِ گوستگیں وھد ءِ ” چیئرپرسن” بانُک کریمہ بلوچ ءُ بی این ایم ءِ لند ن زون ءِ آرگنائزر حکیم واڈیلو گوں کُجام دپ ءُ دل ءَ گوں کُجام روہ ءَ ھما "فاسق” ءُ مُناپکانی گالبند "سیلف ڈیٹرمینیشن&حق خود ارادیت” پہ وت کُتگ ءُ پہ بلوچ ءُ بلوچستان ءِ لَس مھلوک ءِ جَھگیری ءَ انسانی ھَکّانی میان اُستمانی ادارہ ءِ چِـلُّمی دیوان ءَ ماں جنیوا ءَ ہمے نوکیں لوٹے جوڑ کتگ ءُ ایشی ءِ پلامَرزی کنگ ءَ اَنت؟!؟!؟!؟!؟!؟!؟!؟!؟!؟!؟!؟!؟!؟!
چے ھمے گالبند "اصطلاح” ءِ نوکیں لوٹ کَنگ گوں بلوچ راج ءُ گوں بلوچ راجی زُرمبشت "بلوچ قومی تحریک” ءَ دوتل ءُ دوپوستی نہ اِنت؟؟؟

اَگاں ھمے گالبَند بی این پی مینگل ءُ اَختر مینگل ءِ باریگ ءَ گوں "فاسق” ءُ مُناپکانی گالبند” اصطلاح” ءَ ھمدپ”مُترادف” اَت گُڑا مرچی 20 سال ءَ پد چون ءُ چے ھساب ءَ پہ بانُک کریمہ ءُ بی این ایم یورپ "حمل حیدر اینڈ کمپنی” ءَ گوں شاھکاری ءَ ھمدپ "مترادف” بیت؟!؟!؟!؟!؟!؟!؟
چے ھمے گالبند "سیلف ڈیٹرمینیشن یا حق خود ارادیت” ءِ کارمرز ءُ پیسرا چے لوٹ کنگ پہ بی آر پی B.R.P ءُ براھُندگ بگٹی ءَ کول ءِ بی ایس او آزاد ءِ چیئرپرسن بانُک کریمہ ءُ بی این ایم ئیگ ءَ چہ راجی زُرمبشت "قومی تحریک” دَزکشی ءُ تَچگ ءُ "راہ فرار” ءَ ھمدپ ” مترادف” نہ اَت!

گُڑا مرچی چون ءُ چے ھساب ءَ کریمہ بلوچ ءُ بی این ایم یورپ "حمل حیدر اینڈکمپنی” ھمے گالبند ءِ جِند ءَ پہ بلوچ ءُ بلوچستانیانی پادمال کُتگیں انسانی ھَکّانی پَچگرگ ءَ ماں انسانی ھَکّانی میان استمانی ادراہ ءِ چِلُّمی دیوان ءَ پیش کنگ ءُ پلامَرزی کنگ ءَ اَنت؟!؟!؟!؟!؟!؟؟؟….
چے بانک کریمہ ءِ پیشکش کُتگیں گالبند” اصطلاح”، "سیلف ڈیٹرمینیشن” ءُ حکیم واڈیلو ءِ ھمے گالبند ءِ پلامَرزی کنگ ماں وتی بلاگ ءَ چے شِنگ کرتگیں تامُربند”ویڈیو” دروشُم ءَ چہ راجی زُرمبشت”قومی تحریک” ءَ دزکشی ءُ تَچَگ ءُ "راہ فرار” ءِ چیدگ ءُ نشان نہ اَنت؟!؟!؟!؟
آکلاں سَـسّا کن اِت۔۔۔

آدمی سے برا سَنسار آدمی ہے
آدمی کے ہاتھوں شکار آدمی ہے

نبشتہ کار: گزین بلوچ

نوٹ: درج بالا خیالات مصنف کی اپنی رائے ہے ریپبلکن نیوز نیٹورک اور اسکی پالیسی کا مضمون یا لکھاری کے موقف سے متفق ہونا ضروری نہیں۔

مزید خبریں اسی بارے میں

Back to top button