سابق وزیر اعظم شوکت عزیز کے وارنٹ گرفتاری جاری

اسلام آباد: احتساب عدالت نے ایک ریفرنس میں سابق وزیر اعظم شوکت عزیز اور ان کے ساتھی عارف علاالدین کے دائمی وارنٹ گرفتاری جاری کردیے۔

ڈان اخبار کی رپورٹ کے مطابق واضح رہے کہ ان پر الزام ہے کہ انہوں نے اپنے اختیارات کا غلط استعمال کیا اور قومی خزانے کو نقصان پہنچانے کا باعث بنے۔

احتساب عدالت کے جج ارشد ملک نے کرپشن اسکینڈل کی سماعت کے دوران ملزم کی مسلسل غیرحاضری کی بنیاد پر ان کے وارنٹ گرفتاری جاری کیے۔

عدالت کی جانب سے ملزم کی غیر حاضری پر سخت ناراضی کا اظہار کیا گیا اور ساتھ ہی دیگر ملزم عارف علاالدین کے بھی گرفتاری کے وارنٹ جاری کردیے۔

خیال رہے کہ سابق وزیر اعظم شوکت عزیز پر الزام ہے کہ انہوں نے متبادل توانائی بورڈ کے لیے بشارت حسن بشیر کو بطور کنسلٹنٹ غیر قانونی طور پر ایم پی 2 اسکیل کے تنخواہ پیکج پر تقرر کیا۔

شوکت عزیز کی جانب سے بشارت حسن بشیر کی یہ تقرری ایم پی اسکیل پالیسی گائڈ لائنز اور بورڈ کے قوانین کی خلاف وزری تھی۔

واضح رہے کہ 20 اگست 2004 سے پاکستان کے 17ویں وزیر اعظم کا عہدہ سنبھالنے والے شوکت عزیز 15 نومبر 2007 تک اس عہدے پر فائز رہے تھے۔

مزید خبریں اسی بارے میں

Back to top button