ندر پہ بیگواھیں بلوچانی ماس ءُ گھاراں

ندر پہ بیگواھیں بلوچانی ماس ءُ گھاراں

من جیڑاں جیڑاں واب کپاں
ہر سھب ءِ سرا شال ءَ
پرچا لھتے مردم نندیت گوں زھگ ءُ زالبولاں
گوں اکساں گنگیں ھیراناں
ہر راہ گوزی ءَ جست گراں
اے اکس منا کہ دست ءَ انت
منی پیریں پس انت بیگواہ انت
اے اکس منی کہ دست ءَ انت
منی براس ایں کسانیں بیگواہ انت
اے اکس منا کہ دست ءَ انت
منی دست ءِ عصا انت بیگواہ انت
اے اکس منا کہ دست ءَ انت
منی ابی انت کہ بیگواہ انت
اے اکس منا کہ دست ءَ انت
منی لوگ واجہ انت بیگواہ انت
من جیڑاں جیڑاں واب کپاں
اے بیگواھی داں کد مانیت
کد آجوئی ءِ رژن بلیت
کُل بیگواہ لوگ ءَ واتر بنت
گوں زھگ ءُ ماساں تران کن انت
اے زوراکی داں کد مانیت
ماہ وش تئی ہزاریں جستاناں
کد باریں چونیں پسہ بیت
من جیڑاں جیڑاں واب کپاں
اے کوراں ھچی میم نہ بیت
اے چاگرد گوں من پئیم نہ بیت
اے کَراں اشاں ھچ اشک نہ کنت
داں تیر ءُ تُپنگ ءُ بمب نہ بیت
لرزیت مدام دل بولانیں
آ ماس ءَ گنداں گریوانیں
آ گھار پہ براس رنجیگ انت
آ گھار ءِ درداں کئے انت بزانت
کہ درداں کچ ءُ کیل نہ بیت
نو ھیدر الی ھم بوتگ جوان
رھچار انت انگت رمضان ءِ
آ گونڈیں مقدس گپتگ تپ ءَ
نشتگ پہ پّس ءِ امیت ءَ
کد ابا باریں واتریت
چہ بندیگی ءَ آجو بیت
سیما ھم بوتگ باز نزور
تھت ءُ نپاد ءِ باھوٹ انت
وتی براس ءِ انگت رھچار انت
مھناز گوں درستاں ھمدرد انت
گوں بیگواہاں
گوں بندیگاں
اے درد ءَ بگندے زانت مھناز
کہ پس ءِ گاری چوں گار انت
آ ماس کہ پاداں چہ مھر انت
پہ دوست جان ءَ سد پند بُریت
کہ بلکیں بابی واتریت
چہ بدواھانی دست ءَ
آ روچ ءِ وداریگ سک باز انت
انسا انت ءُ ھسنا انت
من نام ءَ کئی کئی ءَ بگراں
ہر لوگ ءَ بلوچ ءِ بیگواہ انت
اے زندان انچیں زندان ئے
چہ زھگاں بلوچ ئے پُر نہ بیت
من جیڑاں جیڑاں واب کپاں
وتی ماس ءُ گھاراں گنداں کہ
راھانی راھاں چاراناں
یک آشوب ءِ نو آراناں
من جیڑاں جیڑاں واب کپاں
کہ ورناہ شال ءَ وش واباں
بے سُد ءُ سما انت چہ ایشاں
بے سُد ءُ سما انت چہ ایشاں

سلمان حمل

 

مزید خبریں اسی بارے میں

Back to top button