دنیا کا مہنگا اور محفوظ ترین اسمارٹ فون متعارف کرا دیا گیا

Phoneلندن(ری پبلکن نیوز) مضبوط ترین انکرپشن نظام، تیز ترین ڈیٹا ٹرانسفر کی طاقت، 23.8 میگا پکسلز کیمرا اور تیزی سے چارج ہونے والی بیٹری کا حامل ملٹری گریڈ سپر اسمارٹ فون سولرین متعارف کرا دیا گیا جس کی قیمت 14 ہزار امریکی ڈالر مقرر کی گئی ہے۔
اسمارٹ فون تو آپ نے بہت دیکھے ہوں گے اب دیکھیے دنیا کا سپر اسمارٹ فون جو اپنے فیچرز کے حوالے سے دنیا کا محفوظ ترین جب کہ قیمت کے حوالے سے دنیا کا مہنگا ترین اسمارٹ فون ہے۔ اس سے قبل بھی آپ نے مہنگے فونز کے بارے میں ضرور سنا ہو گا لیکن ان کی قیمت بڑھانے کے لیے ان کے گرد ہیرے جواہرات لگائے گئے ہیں جب کہ سولرین اینڈروئیڈ پر چلنے والا اسمارٹ فون ہے۔
اپنی پرائیویسی کے حوالے سے آپ کتنا پریشان رہتے ہیں، اگر آپ کو 100 فیصد پرائیویسی چاہیے تو سیرین لیبز کا دعویٰ ہے کہ ان کے فون سولرین سے کی گئی بات چیت تک پہنچنا کسی کے لیے ممکن نہیں۔ کیونکہ اس میں آرمی کے زیرِ استعمال چِپ ٹو چِپ انکرپشن نظام استعمال کیا گیا ہے۔
لندن میں سیرین لیبز کی جانب سے یہ ملٹری گریڈ اسمارٹ فون سولرین پیش کیا گیا ہے۔ اس کی اسکرین کا سائز 5.5 انچ ہے جب کہ اس میں آپریٹنگ سسٹم کے 2 طرح کے ورژنز موجود ہیں۔ ایک ورژن اینڈروئیڈ پر مبنی ہے جس میں عام سوشل میڈیا ایپلی کیشنز وغیرہ استعمال کی جا سکتی ہیں لیکن انہیں بھی ہیک کرنا مشکل ہوتا ہے کیونکہ اس کے پیچھے کمپنی کا زبردست سکیورٹی نظام کام کر رہا ہوتا ہے جب کہ اس میں دوسرا ورژن 256 بِٹ کی چِپ ٹو چِپ انکرپشن استعمال کرتا ہے جس تک پہنچنا کسی کے لیے ممکن نہیں لیکن اس میں ساری عام اینڈروئیڈ ایپلی کیشنز استعمال نہیں کی جا سکتیں۔
سیکرٹ ایجنٹ کے فون جیسے نظر آنا والے اس لگژری فون میں اسنیپ ڈریگن 810 پروسیسر استعمال کیا گیا ہے۔ اس میں ایل ٹی ای کے 24 بینڈز کی سپورٹ موجود ہے جس کی وجہ سے یہ دنیا کے تقریباً تمام نیٹ ورکس کا تیز ترین انٹرنیٹ چلا سکتا ہے۔ 450mbps ڈاؤن لنک اور 150mbps اَپ لنک کی رفتار اسے عام اسمارٹ فون سے تین گنا تیز انٹرنیٹ استعمال کرنے کے قابل بنا دیتی ہے۔
وائی فائی کے ذریعے ڈیٹا منتقلی کے لیے یہ فون 4.6Gbps کی رفتار تک پہنچ سکتا ہے۔ فون کے ڈیزائن کو بدصورت ہونے سے بچانے کے لیے اس میں زیادہ موٹی بیٹری استعمال نہیں کی گئی لیکن اس میں 4000 ایم اے ایچ کی بیٹری ضرور موجود ہے جس میں سپر فاسٹ چارجنگ کا فیچر بھی موجود ہے۔ تصاویر اور ویڈیوز بنانے کے لیے اس میں 23.8 میگا پکسلز کا کیمرہ آٹو فوکس اور فور ٹون فلیش کے ساتھ موجود ہے جب کہ فرنٹ کیمرے کے ساتھ بھی فلیش لائٹ دی گئی ہے۔
یہ عجیب و غریب سحر انگیز فون دراصل پرائیویسی کے حوالے سے فکر مند امیر ترین لوگوں کے لیے بنایا گیا ہے جو دنیا بھر میں سفر کرتے ہیں اور اپنی سرگرمیوں کو پوشیدہ رکھنا چاہتے ہیں۔

مزید خبریں اسی بارے میں

Close